On dagizula. "Aljeria maitea..." idatzi zuen Aljeriako frantses gobernari batek. Gehixenentzat eskandalagarria! Eta bizkitartean, halako atxikimendu bitxi bat sumatzen da gerlari ohi frankoren baitan. Alta bada gure adintsuko anitzek bizitzako urterik hoberenak han galdu ditugu, askok amets onak eta loa, ez gutik bizia bera. Zertako? Erantzunik ez dut. Haatik ene zakua husten dut liburu honetan, eta on egiten dit. Atsegin eman dizazula zuri halaber, irakurlea. Urrundik hasi naiz, 1. gerlatik (1830-1857), 2.aren - gurearen - haziak erein baitzituen. Baina bakearen haziak ere orduan agertzen hasi ziren, Abd El-Kader famatuari esker. Beraz lehenbiziko aljeriar abertzale horri trajeria bat eskaintzen diot liburu honen bukaeran. Paperean lo egoiteko mentura handia du, mirakuluz kanpo. Baina horretan ere plazer berezi bat hartu dut. Idaztea terapia bat omen da...