Combray-ko haurzaro ttipia urrundu da, gero tisanan busti bixkotxa zatiñoak errailearen gogoan iratzarri zuen orthoitzapena jarraiki, gaztaro lehenean Balbec-eko itsasaldetan iragan ziren udako egonaldiekin, nexkato gazte 'ta airosen erdian, eta amatxiren adixkide bati esker erraile gaztearendako hain xoragarri zen Guermantes izeneko jende handietan ezagutza egitea hasi ere, bigarren liburuan (Nexka gazte loratuen itzalean). Orai Combray-n urrundik ikusten zen noblezia zahar hori hor da: Paristar gaztearen aitamak Guermantes-ko hoteleko hegal batean jarri dira bere sehiekin, hetan lehen-lehena "Françoise" Combray-tik familiari jarraikia. Etxeko gora-beheren erdian, Champs-Elysées-etako jostaldiak Zuanen alaba Gilberte eta lagunekin, amatxiren eritasuna eta hiltzea, mediku handienak inguruan, huna adixkideak eta solasaldiak: Saint-Loup-ekin Doncières-ko kasernan, Bloch judu gaztearekin "Dreyfus afera" bete-betean. Hemen da "munduko komedia": arratsaldiak handi-mandien saloinetan, solasak, musikaldiak, antzokiak. Guziak beti irri egitera deramaten begi-beharri zorrotz batzuekin ikusiak eta entzunak.