Bigarren karlistaldiaren osteko foruen galerak eragindako astindu kolektiboaren abaroan sortutako belaunaldi emankorraren figurarik garrantzitsuenetako bat izan zen Arturo Campion. Galdutako eskubide historikoen defentsan, 'Euskal-erriaren alde' leloa iparrorratz hartuta, bost hamarkadako lan mardul bat utzi zion Euskal Herriari, jorratu zituen atal ugaritan: literatura, historia, antropologia, hizkuntzalaritza, artikulugintza, oratoria eta politika, besteak beste.