«Bazen behin, Gaua, eta baziren behin, Maindire, Izara eta Mihise izeneko hiru ahizpa. Iluntzeetan, Ilargia bere dirdira eta guzti iratzartzen zenean, Eguzkia, lotsatuta, ezkutatu egiten zen, berriro ere irteteko ausardia aurkitzen zuen arte; hurrengo goizera arte, hain zuzen. Baina bien bitartean, gaua zen. Eta ume guztiek bezala, Gaua heltzean, Maindire, Izara eta Mihisek ohera joan behar izaten zuten, gurasoen aginduz. Alabaina, hiru ahizpek gorroto zuten ohera joatea».