Ehunka gazte hil zituen herrian zaldiak; edo haren gainean etorri zen hiesak. Bina hura ez zen izan belaunaldi motel, triste bat; aitzitik, musika, sexua eta parranda maite zituzten, amets, jolas eta borroka egin zuten, eta bizitzak zekarzkien aukera guztiak deskubritu nahi izan zituzten. Baita heroina ere. Hainbat ahotsez osaturiko lan koral bat da hau: Izaro eta Unatz, Gaizka eta Itzi, Mikel eta Sonia, Aigeru eta Joxemigel... Haien guztien oroitzapenak eta bizikizunak josiz ondu du Ekaitz Goienetxeak bere estreinako eleberria, 80ko hamarkada eta gaurko garaia, Uria eta Herria lotzen dituena; gordina eta zikina batetik, lirikoa eta ederra bestetik. Portu gainean hegan dabiltzan itsastxorien antzera, begiz joko ditu arrain-kaxak eta sareak, xiringak eta koilarak, lapurretak eta larru-jotzeak, karramarroak eta bestelako mamarroak.