Dani Fanok argitaratu duen azken lana aurkeztuko dute Intxaurrondoko kultur etxean, Migel Marmolen hamaika eta bat jaiotzak eleberri grafikoa, hain zuzen. Igor Leturiak euskaraz zuzenduko duen solasaldia 19:00etan hasiko da, eta Fanok ere parte hartuko du aurkezpenean.Urriaren 25ean Komikigunean aurkeztu zuen lehen aldiz Migel Marmolen hamaika eta bat jaiotzak lana, eta han azaldutakoaren arabera, liburua zortzi urteko lan nekaezin baten emaitza izan da. Eduardo Galeanoren eta Roque Daltonen idatzietan oinarritu da Fano, El Salvadorreko Alderdi Komunistako kide historikoaren inguruko komikia egiteko. Liburua euskaraz eta gaztelaniaz argitaratu du Astiberri argitaletxeak.