Garaziko hizkuntza-aldakortasun diafasikoa ikertzea da lan honen helburua, hiztun baten estilo informala eta formala alderatuz. Donibane Garaziko Irulegiko Irratian lanean ari den esatari bat izan dugu horretan lagun. Mintzo informala lortzeko, berarekin izandako lagun-giroko elkarrizketa baliatu dugu, eta mintzo formala lortzeko, berriz, irratiko jarduna aztertu dugu. Nazioartean, era honetako ikerketa andana egin da, mintzo formala lortzeko testuinguru naturala eta ikertzaileak bortxatu gabea eskaintzen baitu irratiak. Alta, ez dugu oraindik horrelako lanik euskarari dagokionez. Azterketa kualitatiboa eta kuantitatiboa uztartuko ditugu. Emaitzek frogatuko digutenez, estilo formalean, lekukoak forma osoen eta ahoskera zainduaren alde egingo du, eta Iparraldeko Batuaren eragina ere agertuko da.