Buhameen presentzia mende batzuez geroztik gure eskualdean gai sentikorra da, eta aski ezezaguna oraindik. « Pobreak ziren, besterik ez ! » Eta ez, ez hori bakarrik... Gaur, lekukotasun ekartzeko, Buhameen ondoko batzuek liburu hontan kontatzen dute haien familiaren historiaz ezagutzen dutena, bai eta herentzia hori gaurko egunean nola bizi duten, eraman zaila baitzitekeen zenbaitetan. Zeren Euskal Herriko Buhameen komunitatea, Tzigano jatorritik datozen ezaugarri fisiko, hizkuntza, eta bizi moldearekin, betidanik baztertua izan da. Horren Historia hemen harilkatua da gertakari historikoetarik, bai eta XIX.mende hondarreko Jean Barbier apez eta idazlearen testu batetarik, zeintan Donibane Garazi ondoko buhame auzo bat deskribatu baitzuen.