Lacoste entzutea nahikoa da krokodilo bat gogora etortzeko, krokodilo baten ikurra daraman nikia, hain zuzen. Baina, nor izan zen ikur honen sortzailea? Jean René Lacoste izeneko kirolari bat izan zen. Jaiotzez paristarra, baina jatorriz Donibane Lohitzuneko familia batekoa zena. Elastiko krokodilodun honek 75 urte bete berriak ditu eta jatorri euskaldun hauxe erakutsi dute antolatu dituzten ospakizunetan, hau da, uda honetarako bilduma berria aurkezteko New Yorken egindako moda-erakustaldian. Bertan, munduko txoko guztietatik etorritako moda-kazetarien aurrean, Lacoste etxeak bere azken jantzi-bilduma aurkeztu baitzuen. Pilota-frontoi baten itxura gogoraraziz, kolore gorria eta zuria nabarmendu zituzten, modeloek soinean apretak eta gerrikoak zeramatzatela.