Zerua gailurraz ukituz altxatzen da harro
Lapurdiko eta Nafarroa Garaiko
baserri, borda, herri eta oihanen gainetik, 
Sara, Azkain, Urruna eta Bera
bere magaletan hazirik,
lehen euskaldunak sortuz geroztik 
Larrun dugu mendi berezi eta preziatua,
hurbil eta urruna, halaber,
Mari, Sugaar, Basajaun eta Tartaloren bizitokia,
erreka aratz garbietan jolasten diren
antzara zango eta adats horiko laminen habia,
sasi guztien gainetik eta hodei guztien azpitik
hegaldatzen diren sorgin alaien erresuma,
pottoka eta betizuen bazka,
artzain eta artaldeen belazea,
iturri garbi eta kantarien sehaska.