Urtero, ekaineko azken igandean, hainbat lekutako jendea biltzen da Noainen, Nafarroako independentzia galdu zen 1512ko gudua oroitzeko. Uzta biltzeko garaia hasita, eguzkiak bete-betean jotzen duelarik, beroak infernu bilakatzen du ibilaldia. Baliteke baten bati, aurpegia zapiaz lehortzen duenean, gogora ekartzea duela bostehun urte bizi izan ziren haien izerdia, Gaztelako tropa askoz ugariagoak iristen ikusi zituztenean. Baina egun hartako odola aspaldiko gauza da, eta oraingo nekeak lagun talde batenak besterik ez dira, oroimen historikoa berreskuratzeko ahaleginean bilduta.