Ezker abertzalearen ilegalizazioak instituzioen osaketa desitxuratu du, baina hauteskundeetako emaitzak errealitate politikoaren argazki argia utzi du. Orain artekoa baino argazki zehatzagoa da, alderdiak euren artean gehiago negoziatzera behartuko dituena, joko politiko zabalagoa eskainiko duena, bake prozesuari aukera berri bat zabal diezaiokeena. Soziologikoki aztertuta, Euskal Herriko emaitza orokorrek ohiko mapa politiko aberatsa erakusten dute, nahiz eta, ezker abertzalearen zati handienaren legez kanporatzearekin, pluraltasun hori ez den indar guztiarekin ordezkatuko erakundeetan. Eta hala ere, instituzioetako osaketa eta agintaritza berbanatu egingo da. Oro har, gehiengo absolutu askoren desagertzeak monopolioen amaiera eta joko politiko aberatsagoa ekarriko ditu, foru zein udal erakundeetan. Datozen egunetarako, halaber, erakundeak osatu eta ANVren legez kanpoko botoak eserleku ez bihurtzearen ondorioz, leku askotan tentsio handiko uneak biziko dira seguruenik.