Bizitza guztiek dauzkate sekretuak gordean, eta lehenago edo beranduago ia denak ateratzen dira agerira. Katixa neska koxkor bat da, txatartegi batean bizi dena bere aitarekin. Arratsaldeetan aitaren lagun heavyak etortzen dira txatartegira beren motoekin, rock musika entzun eta garagardoak edatera. Asteburuetan, berriz, amona bisitatu eta harekin txokolatea hartzera joaten da, horretarako soineko pinpirin bat jantzi batere gustatzen ez bazaio ere. Horrela doa Katixaren mundua; halako batean, baina, berak ezagutu ez duen amaren gainean gehiago jakin nahiko du; haren argazki bat dauka bere gelan gordeta, baina misterio batean inguraturik sumatzen du amaren bizia...