Duela urte asko, baina asko asko, pertsonek (edo gutxienik umeek) animalia txikienen mintzoa ulertzen zuten garaian, Minia izeneko neskatila bat bizi zen herrixka txiki batean. Miniaren etxean, aita eta amaz gain neba-arrebak eta amama bizi ziren, bai eta Gorri izeneko eper-zakurra, adar bat falta zuelako Motz esaten zioten behia, eta aurpegia eta hankak zuri zituen katu beltza, Fran izenari erantzuten ziona. Fran zen etxera heldutako azkena. Bi hilabete baino ez zituen eta Miniaren kuttuna zen.