Azalera handietan behar duguna baino %45 gehiago erosi ohi dugu. Egun hauetako kontsumo-gehiegikeriak ez du mugarik baina neke eta izerdiz ederki irabazitako jornaletik bizi garenez, lastima litzateke lanordu mordoa gozatu gabe (gozatu gabe: horretaz ari gara) zakarrontzian uztea, tentazio ergeletan amiltzea, alferrikakoetan dirua xahutzea, ongizaterik ekarriko ez diguten produktuak erosten patrika hustea. Datorren urteko aldapa malkartsuan gora hasiak gara dagoeneko.