Sadako eta paperezko mila kurriloak kontakizunean Hiroshiman bizi den neskatxa baten bizitzako azken urtea azaltzen da. Sadako leuzemiaz gaixotu zen, bere hirian jaurti zuten bonba atomikoak eragindako erradiazioen ondorioz. Benetan gertatutako istorioa dugu.
Ikasturtearen hasieran Sadako errelebu taldean korrika egiteko aukeratu zuten eta poz-pozik zegoen. Izan ere, korrika joaten zen beti bazter guztietara. Lehenengo lasterketa bere taldeak irabazi zuen, baina korrika egin ondoren izugarrizko zorabioa izan zuen. Handik aurrera, Sadako behin eta berriz zorabiatzen hasi zen, baina hori inori ez esatea erabaki zuen. Otsailean, konorterik gabe erori eta ospitalera eraman zuten. Hainbat froga egin ondoren, leuzemia zuela ikusi zuten. Ospitalean gelditu behar izan zuen. Chizuko lagun minak, urre koloreko paperez egindako kurrilo bat eman zion behin eta kurriloei buruzko kondaira zaharra kontatu zion: paperezko mila kurrilo eginez gero, desioak egia bihurtzen dira. Aurrerantzean, den-denak Sadakori paperak eramaten hasi ziren, kurriloak egin eta sendatzeko.
Sadakok ez zuen inoiz sendatzeko itxaropena galdu, baina hala ere, urriaren 25ean, hil egin zen.