Maitasuna : gizon-emakume guztiok eskuratu nahi genukeen ondasuna, sentimendu bortitzenak sortarazten dizkiguna : pozik handienak bezala, tristurarik sakonenak. Artistak, ordea, gehiago inspiratu dira zoritxarreko amodioan, zoriontsuan baino, malurak eta dohaikaitzak eragin dituzte beti poema hunkigarrienak, euskal kanturik ederrenak. "Amodioa gauza tristea..." Janbattitt Dirassar-en eleberri honetan ere maitasunaren nahi eta ezina dugu gai nagusia. Josepe protagonistak gaztetatik senti du bihotzean amodio-egarri bat, orain neska batengana, gero beste batengana eramanen duena. Horrela ezagutuko ditu Maider, Pantxika, Maddalen, Kattina, Luixa, Mirentxu, Elena, Maite, Magali, Loretxu eta beste zenbait. Batzuetan patuaren esku beltzaren ondorioz, besteetan mutilaren lotsa eta koldarkeriaren kausaz, beti bada zerbait maitasun hori halabeharrez trabatzen eta galarazten duena, baina beti geratzen da bizirik amodio eder baten esperantza...