Antonio Bolas 1923ko urriaren 20an jaio zen Zegaman, eta 1999ko ekainaren 14an hil. Igeltseroa zen langintzaz eta bere zaletasunik handiena gezurrak esatea. Gezur politak ziren harenak, finak, irudimentsuak, denak barrez lehertzen jartzeko modukoak ; Antoni artista baitzen gezurrak egiaren kolorez esaten. Bere etxeko ganbaran hegazkin-kumeak edukitzen zituen, gasolinarekin itzali zuen behin sua, itsaso azpian baldosak jartzen ere askotan aritu zen, seme bat ere ba omen zuen bera baino zaharragoa, urte batean hiru uda pasa zituen Frantzian frantsesa ikasten... Horrelako pasadizo ugari aurkituko ditu irakurleak, marrazkiz horniturik, hildakoari ere barre egingo liokeen liburu bitxi honetan.