- "Asto bat da ? Zertarako nahi duk asto bat ?" -ziosten batak eta besteak. Bira hori egitekotan autoa erosteko dirua emateko prest nuen adiskiderik ere agertu zitzaidan.
Zertarako ? Galdera bera egin diot neure buruari behin baino gehiagotan, hotzak eta nekeak menperatuta egon naizen egunetan.
Emaztea eta hamazazpi hilabeteko semetxoa lagun eta astoa zamari, erabakia nuen euskaraz egiten den euskal lurrari bira bat oinez egitea. Azkenean ere, irailaren 23an abiatu ginen, arratsaldeko bost t'erdietan, eta abenduaren 4an etxeratu, ilunduta. Zazpiehun eta berrogeita hamar kilometro berrogeita bost egunetan ibiliak. Ibilaldi osoaren iraupena hirurogeita hamahiru egunekoa.