Jainko maitea ! Zeinen gazte nintzen eta nola maite nuen gizon hori ! Eta nola sufritu nuen !... Hau ez da minezko heiagora bat, deitore mendekati bat, ez, noizean behin ateratzen zait hasperen hori, hauxe esateko erabiliko nukeen doinuaz : "Bazenekite zeinen gaixorik egon nintzen, orain dela lau urte !" Eta, aitortzen dudanean: "Erail eta hil nahi izateraino jelosturik egon nintzen", beste hau kontatzen duten jendeen antzera egiten dut : "70ean arratoikia jan nuen, bada..." Oroitzen dira horretaz, baina oroitzapena besterik ez dute gorde. Badakite arratoikia jan zutela, baina ezin dezakete jadanik beren baitan biziberritu ez izialduraren hotzikara, ez gosearen sukarra.
Lehenengo saldukerien ondoren, urguilu eta egoskorkeria amorekaitzez hasi nintzen sufritzen.