Thomas Huxley naturalistak esan zuenez, dozenerdi tximinori idazmakina bana eta eternitatea emanez gero, British Museumeko liburu guztiak idatziko lituzkete. Egia da. Dagoeneko jarri ditugu tximinoak lanean: makinak dira, eta hortxe dihardute, jo ta sua. Hasi dira liburuak idazten, ziberliteratura egiten. Ingelesez, jakina, ez baitute makinek edo tximinoek euskaraz ikasteko ganorarik erakutsi. Zibernetikaren euskal historia arras xumea dugu oraingoz. Barregarria, kasik. Gutenberg galaxian Bernat Etxepare guretzat goizeko izarra izan zen bezala, ziberrespazioko aro berri honetako lehenbiziko supernova distiratsua Vicente Cil de Paulesen ipuin pornografiko bat izan da. Iruñeko sex-shop batek jarri zuen online, erran nahi baita Interneten, kontaktuen sekzioaren eta kontsoladore salmentaren artean...