Emakume demonio asko azaltzen dira Thompsonen nobeletan, agian gehiegi (...) Baina ez pentsa Thompsonek pertsonaien artean bereizketarik egiten duenik haien barren ilunak agerian uztean. (...) Gizonezkoak emakumezkoak baino okerragoak direla esan daiteke: lapur ziztrin, pailazo, psikopata, erdi-txoro-erdi-ergel, astakirten... antiheroiz jositako sail amaigabea osatzen duen jendailatik kosta egiten da taxuzko bat aukeratzea.
Chandlerrek esan zuen Hammettek krimena lorontzi veneziarretik atera eta bere benetako lekuan jarri zuela, kale gorrian alegia. Haren parafrasia eginez esan daiteke Thompsonek krimena kale beroetatik atera eta gizakiaren bihotz izoztuan jarri duela, benetan dagokion tokian. Gaizkia ez baita kanpotik datorren zerbait, baizik gizon-emakumeen isurkinei darien berezko hatsa.