Katalina Erauso pertsonaia historikoa baino gehiago, bene-benetako mitoa dugula esan liteke. Donostian 1592an jaiotako emakume honek milaka orri betearazi ditu historia-liburu eta nobeletan, baita filmeetako gai bihurtu ere. Izan ere, jendearen jakinmina pizteko osagai guztiak baititu haren bizitzak : txikitan haur-komentu batean sartu zuten ; hamabi urte zituela handik alde egin zuen eta batetik bestera ibiltzeko, mutil itxura hartu. Han eta hemen morroi ibili ostean Ameriketara jo zuen, gizon-jantzita beti ere, eta han abenturaz beteriko bizimoduari ekin : soldadu, merkatari, iheslari,... Hego Amerika osoa pasatu zuen, behin eta berriz sartzen zen istiluetan eta nolako borrokari ausarta zen erakusten zuen horrelakoetan.
Historia eta leienda nahastu egiten dira Katalina Erausoren bizitza kontatzean, eta XVIII.mendea urrun samar geratzen zaigunez, zaila da gaur egundik begiratuta egia zehatza jakitea. Aitor Zuberogoitiak, historialari fidagarrienen testuetan oinarrituta, modu arin eta gustagarrian kontatu digu emakume harrigarri honen bizitza menturaz betea, gaurko irakurle euskaldunarentzat alderdi askotatik interesgarri gertatuko dena.