Peru Abarka balio handiko obratzat hartu baldin bada, ez da euskara on, jagon eta aberats baten altxorra delako bakarrik izan, ezpada horreraz gainera edukiz trinkoa, ugaria eta zabala delako. Gauzak zelan esaten diren garrantzitsua baldin bada obran, are gehiago zer esaten den. Goitik behera aurrez pentsaturiko lana dirudi, obra neoklasiko bati dagokionez. Egitura orekatsua du. Egitura horretan txertatuko ditu egileak aurretiaz bildurik dituen hainbat eta hainbat jakingarri, bakoitza dagokion lekuan. Berba alperriko gutxi dago testuan.