Manuel Lasarte Arribiliaga, Lasarte bertsolaria, pertsonaia ezaguna eta maitatua izan da Euskal Herrian. Azken 15 urte hauetan plazetan ez bada azaltzen ere, 1955 ingurutik 1982ra bitartean, etengabe ibilia da herriz-herri eta plazaz-plaza bertso kantari. Nafarroako Leitzan jaio eta Gipuzkoako Orion bizi den bertsolari honek hiru berezitasun izan ditu bapateko bertsogintzan : errimak edo oinak aukeratzeko garaian hoskidetasun harrigarria ; esaldiak neurtzeko erreztasun paregabea eta kantaera gozoa. Plazetatik erretiratu denean idazten lan asko egin du. Horren lekuko dira argitaratu dituen sei liburu eta egunkari batean idatzi dituen hainbat artikulo. Horretaz gain, hizlari kuriosoa eta kontalari aparta da. Berezitasun guzti hauen erakusketa bat duzu liburuska honetan, eta zalantzarik ez izan, hain itxura serioa duen bertsolari honek une gozoak eskeiniko dizkizu, eta, goza ezazu lasai-lasai bere ezagutzarekin.