"...beti bizi gara Ameriketan. Inperio amerikarraren gainbeheraren garaietan bizi gara eta bere kultura sudurzulotik ere sartzen digute. Eta are, gustatu egiten zaigu. Beraz, kasu hauetan hobe puristak ez izatea eta, dagoeneko inperioaren eraginpean bizi garenez, guzti horri geure edukin lokal eta berezia ematea. Bestela ez da irtenbiderik". Kaliforniatik idazten digu Joseba Gabilondok bere lehenengo liburu hau. "Bihotzez" idatzi ere, gutun moduan aurkezten baitira artikulu hauek ; edo, hobeki esanda, Zabalik-edo artikulu itxuran idatzi dira eskutitz hauek, egilearen feed-back eta txanpon beharrek eraginda. Bere lagunei, guri denoi idazten digu, auzo globalak Kalifornia izena duen txoko hartatik, bertako bizitza eta zorabioen berri emanez : musika eta zinema, parrandak eta maitasuna, utopia galduak eta borroka berriak... Baina, azken batean, kronika hutsa baino gehiago literatura da idazlan hau : bere inguruaren berri ematean, bere barrenean bizi eta sentitzen dituen kontraesan, gurari eta pilpirak adierazten baitizkigu Josebak Gabilondok. Patxi Larra–agak hitzaurrean dioen bezala : "Eskutan duzun liburuak irakurketa posible asko ditu. Lehenengoa, noski, 'Bai dibertigarria Amerikan bizitzea'. Neri, ordea, hau da atseginen gertatu zaidana : dena oker badoa ere, badagoela oraindik utopiarako leku bat, bai artean eta bai bizitzan ere, eta badirela utopia berrien eraikuntza lanari ekiteko irrikitan daudenak. Bata, Gabilondo".