Zaila da Kubako egoera bi hitzetan deskribatzen, bidaldi oso bateko sentipen eta esperientziak orri batzuetan laburbiltzen. Eta, hala ere, bere inpresioak azaltzen saiatzen dira han izandakoak, uhartea zelan aurkitu duten galdetzen diegu behin-berriro hemen gelditutakoek. Ezinbesteko hizketa-gaia bihurtu baitzaigu hangoa. Juan Martin Elexpuru ere izan da Kuban. Bizikleta aldean hartuta, hilabete batean Karibeko isla alderik alde zeharkatu du, Habanan eta Santiagon egonaldi luzeagoak eginez. Bertako paraje eta paisaiei baino gehiago erreparatu die, ordea, Kubako andre-gizonei. Jendearekin solas etengabean ari da, bertakoak ere horretara emanak izaki. Bata bestearen atzetik datoz liburu honetan bizikizunak, pasadizoak eta bestelako bitxikeriak. Kubako errealitateaz mintzatu bakarrik ez, ikusi, ukitu eta usaindu ere egin du egileak, era guztietako kubatarrekiko harremanetan. Orrietan barrena aurkituko dituzu Castrorekiko iritzi anitz, merkatu beltza, sozialismoaren harrotasuna, dolarren harrapaketa, turistaren ehiza, independentziaren duintasuna, prostituzio mozorrotua eta beste hainbat alderdi, aurpegi askotako kaleidoskopioa baita gaur egungo Kuba, nondik begiratu nahi zaion, hura azpimarratzeko.
Kontalari-sen bizi-bizia ageri du Elexpuruk kontaketa honetan. Deskribaketa eta sermoiak alde batera lagata, trebea da narrazioan, iaioa elkarrizketetan. Horrela lortzen du bidaiaren sentsazioa itsastea irakurleari, eta aldi berean eleberri baten arintasuna txertatzea bidai liburuari.