Bazter elurtsuetako kontakizunengatik ezagunagoa bada ere, Jack London ibili zen Pazifikoko uharteetan zehar ere (Samoa, Fiji, Hawai, Tahiti) eta horien fruitu izan ziren Hego itsasoetako ipuinak, gizon zuri zibilizatzailearen eta kolonizatu gabeko “basatien” arteko borroken erakusgarri. Hiru istorio aukeratu ditugu guk: “Txinagoa”, kontakizun laburraren edozein antologia unibertsaletan agertzeko moduko lana, pasadizo xume batetik abiaturik kapitalismoaren makina zer nolako ondorio krudeletara iristen den erakusten digun ipuin umoretsu eta hala ere tragikoa; “Bale hagina”, misiolari ausart baten gorabeherak kontatzen dituena; eta “Salomon uharte beldurgarriak”, basatien mitoari txantxa ederra egiten diona.