Jean Haritschelharren tesi honek helburu garbia du : Pierre Topet-Etxahun (Barkoxe, 1786-1862) bertsolariaren obra behin-betirako finkatzea. Azpitituluak adierazten duen bezala, filologiaren ikuspegitik eta filologiaren metodologiaz egindako lana da : ezagutzen diren aldaera guztiak aztertu eta elkarrekin alderatu egiten ditu lehenik egileak, zehaztasun erabatekoz. Aldaeren arteko kontraesanak aurkitzen dituenean, testuingurura jotzen du (egilearen bizitza, garaiko joerak, eta abar), testu "egokia" erabakitzeko.
Finkatze lan horrez gain, sailkapen bat ere eskaintzen du egileak, Etxahunen bertsoak lau ataletan sailkaturik : autobiografikoak, satirikoak, zirkunstantziakoak eta Etxahuni egotzitako kantuak. Filologia lan eskerga izan arren, ordea, ez da filologia hutsezkoa. Egileak ondo ezagutzen du Europako literatur tradizioa, bai idatzia eta bai ahozkoa, eta horrelako erreferentziaz josita dago testua.