Marginalia deritzan honetan 1987an idatzitako saio laburra biltzen dira, "Ni ez naiz hemengoa" egunkarian 84ekoak bezala. Hemen ere literatura, poesia eta arteari buruzko oharrak eta gogoetak izkiriatzen ditu. Bada alderik ordea : batetik zabalagoa da ukitutako gaien zerrenda, boterea, iraultza, lengoia, zapalketa eta horrelakoei helduz ; bestetik, egilearen pentsakera osatuago, sendoago ageri zaigu, eta hau heldutasun seinale gisa ulertu behar dugu. Dena dela, ideologo baino gehiago literaturgile da Sarrionandia, eta proposatutako marginalitatearen perspektiba horretatik, gehiago dira sortzen dizkigun galderak emandako erantzunak baino ; mundua aldatu nahi badugu pentsatzea dugulako lehenbiziko eginkizun. Idazlearen beste alderdi bat, hunkigarri eta umoretsu, pertsonalagoa agian, adiskideei egindako gutunetan agertzen zaigu. Guzti hori gainera, Josebaren ohizko hizkuntza landu eta miragarrian.