Artikuluen aurkibideari erreparatzen badiozu, berehala ikusiko duzu gaurkotasun eta bizitasun handiko gogoeta-gaiak hautatu dituela idazleak, oro har. Bere inguruari eta garaiari adi eta erne bizi den kazetari batek ezinbesteko duen bezala. Bere gogoetak azaltzeko orduan, ordea, ofizioak, jardunak eman dion kazetari-sena janzten eta aberasten dioten bi ezaugarri nabarmentzen zaizkiola esango nuke.
Batetik, gure munduan, hurbilekoan eta urrutiagokoan, kezkagarri batzuetanetan, pozgarri beste batzuetan, gogoeta-bide beti ere, eta, azken finean, biziarazten eta aurrerarazten gaituzten gizarte-gaiekiko ardura eta ezagutza : idatzi laburrak izanagatik ere, ez da azal-urratze hutsean geratzen. Ikuspegia du sakona eta irizpidea jantzia. Beti izango duzu zeure gogoetetarako abiapuntu egoki eta lagungarri.
Bestetik, adierazpide argikoa da : berak nahi duen ildotik xamur eramango zaitu gaiaren azalpenean. Badaki iritzia argudiatzen eta entzule-irakurlearen jakin mina sarrerako hitzetatik bertatik hasita erakartzen. (...) Nabarmentzen zaio aktualitateari buruzko zutabe-idazleak behar duen esku on hori. Baita umore-ikutua ere, gaiak hala eskatzen duenean eta bere azalpenerako baliagarri zaionean.