Hori bularreko haurrak ere bazekin Maria: nola amodiozko errukian hala gorrotozko mendekuan, gizon noblea baino tranpoxagoa dun emakumea; izan ere, bai konpasioa bai krudeltasuna, nork bere boterea indartzeko arma baizik ez baitira; eta ahulak hori behar din: indarra bereganatu, nola edo hala. Gizon noblea aldiz, zakarra eta bapatekoa dun. Gorputzaren indarra nobleagoa baita beti, ixpirituarena baino. Bi alderdiok batera bildu zitezken, hanka sartzeko bildur haundirik gabe, eta esan, oraindainoko gure historia, gixantxen historia alegia, ixpiritu zikin horren testigutza baizik ez dela izandu, lautik hiru. Horrexegatik dun gure historia ofizial gehientsuena gixatxarrena, edo hobeki esan, gixonerdiena. Gizon nobleak, larru beteko gizonak ez baitu bere ondotik historia haundirik uzten.