Abentura liburu biribil eta ospetsurik inon bada, hauxe duzu bat. Espedizio-bidaia lurralde ezezagunetan, altxor ezkutuaren bilaketa, arrisku franko, borroka latzak... beharrezko osagai guztiak ditu esku artean hartu eta bukatu arte utzi gabe irakurketaren atsegin betea emateko. 100 urte baino gehiago dira liburua lehenengoz argitaratu zela eta ordutik hona ezin konta ahala edizio izan ditu ingelesez eta munduko beste hainbat hizkuntzatan; liburuetan ezezik filmeen bidez ere arrakasta galanta lortu du, bertsio bat baino gehiagorekin. Allan Quatermain elefante-ehiztaria literatura unibertsaleko heroirik ezagunenetakoa bihurtu zen, Sherlock Holmes bezala bere egilea ia-ia itzalean uzteraino.