Otsoaren urtea hastera zoala, etxea, etxekoak eta herria utzi nituen, hiri nagusirako bidea harturik, gortean koblakariek ogia errex irabazten zutela entzuna nuelakoan. Hiri nagusian nardaturik, erregeak doi bat lagundu ninduela, erresumako bide eta ibaietarik ibili nintzen. Lurralde asko kurritu ondoan, zahartzaroan sarturik, mendi honetara igan nintzen, aterbe bila. Bidez bide bildu porroxka hauek eta ene baitako orroitzapenen burrunba dauzkat bizi baten hatz eta hondakin bakarrak.