Manhattan hau ez da filme bat, ez dago New York-en ; putetxe bat da eta Bilbon dago. Hara biltzen dira, larru beltzaren desirak erakarrita, lehorreko marinel deslaiak, gaueko naufragioetako azken hondarrak. Intentsitate handiko istorioak dira Edorta Jimenezen liburu honetakoak. Bortitzak dira pertsonaiak darabiltzaten grinak, gordinak dira ipuinetako pasadizoak, giroak, berbak. Hala ere, gaua, droga, sexua ez dira derrigorrezko osagarriak baizik, funtsezkoa giza bihotzean habia duten irrika eta pasio zahar guztiak dira, horiexek egiten baitituzte eternalak, aldi berean horren modernoak diren kontakizunok. Bederatzi ipuin, bederatzi bidaia kanpo-geografian zehar nahiz larruazalean barrena, irudiz, txinpartaz eta ustekabez beteriko hizkuntza gihartsu, bizi eta harrigarri batean kontatuak.