Tarteka sortu izan dira pentsabide bereziko pertsonak. Sortu izan dira, tarteka, ekinbide bereziko gizakiak ere. Oso bakan sortu direnak biak uztartzen dituzten pertsonak dira. Horietako bat da, inondik ere, Mohandas Gandi. Pentsabidea ekinbide, ekinbidea pentsabide eta biak bizibide izan dituena. Patxadaz aditzeko moduko ahotsa, hotz eta hotsen oihan ozen honetan. Patxadarik bai ?
Bakezale aurkeztu digute, eta borrokalaria zen. Erlijioso izpiritual aurkeztu digute, eta politikagilea zen. Borrokalarientzat bake-mezu eta bakezaleentzat bake-mezu ? Tarteko zerbait, beraz ? Ez dut uste. Gandiren ahotsa ez da tartekoa, sakonekoa baizik. Bakeak eta borrokak elkar laztantzen duten tokikoa. Erlijioak eta politikak elkar ezagutzen duten muinokoak. Ausardiak eta pairamenak elkarri zirri egiten dioten lekukoa. Guk ez dugu, seguru asko, horrelako muinorik aurkitu, horrelako tokirik ezagutu. Sumatu bai agian ? [...]