Törless ikaslearen nahasmenduak Robert Musilen lehenengo eleberria izan zen. Liburuan Törless kadete gazteak nerabezarora iristean pairatzen dituen nahasmenduak kontatzen ditu idazleak. Gaztetan Mährisch-Weisskirchen barnetegi militarrean izandako bizipenetan oinarriturik, Musilek institutuko giro itxi eta mehatxagarrian kokatzen ditu Törlessek barneko isuri berriak ezagutzeko egiten dituen ahaleginak. Nortasunaren bilatze-prozesu hori barneko nahien eta kanpoko errealitate itogarriaren arteko kontraesanen deskribapena da.