Apuleiok, asto bihurturiko pertsonaia metamorfoseatuaz baliaturik, gordintasun osoz erakusten dizkigu bere garaiko gizartearen aldetik kritikagarrienak Metamorfosis edo Urrezko astoa honetan. Hala ere, narratzailearen jarrera ez da batere etsia. Fortunaren kolperik bortitzenak jasota ere, protagonistak jakin-min izugarria erakusten du, eta ez du bere asto egoeratik irteteko irrika inoiz galtzen. Ez du heroiaren jarrerarik, baina antiheroi askoren kasuan ez bezala, etengabeko jakin-minak eta bidaian ez etsitzeak elikatzen dute gure antiheroia.