"Puerto Cabello-ko kai baretsuan oinak jartzearekin batera, Ameriketako lurraldeetan zutik eta osasuntsu aurkitzen nintzela ene bihotz taupada biziek adierazten zidaten. 1947ko udazkenean.
Hogeitaka egunetan, iparraldetik hegoalderantz, itsaso zabalaren erdian ibili eta gero, kresalak aurpegi eta soinari itsasgizonen itxura eta tankera erantsi bazidaten, eguneroko itsasibiltzeak eta itsasontziko bizimoduak batez ere, ibilkera bera ere aldatu zidaten eta, behin lur hartuz gero, neure lehenengo pausoak, arretaz, ondo neurtuak eman nintuen.
Buruan ondo gordeta neuzkan asmoak gogora zetozkidan bat-batean, zalapartaka zein lehenago, nahasketa bizian.
Nondik eta nola hasiko ote nintzen ? Neure buruari egiten nion galdera honek, arnasa pixkaren bat estutzen zidan. Gauza berriak ikusteko gogoa batetik eta ustegabeko etorkizunaren gorabeherak bestetik, borrokan neuzkan golkoan."