"-Astoaren putza, ez zagok, ba, bero handirik!
-Kakazaharra, egia duk, non arraio sartuko gara negu honetan, gaztelekua itxi badigute?
-Harritzekoa ixtea, hi -esan du Thierryk-. Morroiak kanutoa muturrean sartzen hituan...
-Morroiak, morroiak! Zeintzuk dira ba, morroiak? -galdetu du Bengstonek, kontua berarekin doalakoan-. Hik ez duk sekula txirrik erre ala?
-Nik ez diat halakorik esan! -defendatu da Thierry-. Nik bakarrik esan diat kontu apur bat gehiagorekin ibilita, ez zutela txiringoa itxiko.
Patek zigarrokina kanpera tzarrarekin zapaldu eta hitza hartu du:
-Hala ere, ze axola zaie, ba, txirri bat gora-behera? gul elkartzeko leku bat nahi diagu, gainerakoa geure kontua duk!