Asteazken arratsaldea. Lau neska-mutil. Eskolan aspertzeko gogorik ez eta piper egiten dute. Hortik aurrera zenbait abentura gertatuko zaizkie, parranda koxkor bat, euskal mitologiarekiko jolas bat... Eta, azken batean, ikasgelatik nahiz egunerokotasun grisetik ihes egitea zilegi dela, eskolatik kanpo ikasten baitira bizitzako gauzarik inportanteenak. Horixe da "Asteazkenez amaitu zen astea" ipuinaren mamia. Bilduma osatzen duen besteak, "Kukurik kukura urtea", bestelako istorioa kontatzen digu: izadian ikusten diren ankerkeriak eraman ezinik, horiek konpondu nahian hasiko da mutiko sentibera bat, baina, sarritan, gure helburu gorenak ez datoz bat errealitatearekin eta hor sortzen da talka. Bukaera irekia du kontakizunak, eta irakurketa-modu bat baino gehiago eskaintzen du.